قصيدة قتلى نجع حمادي

قصيدة قتلى نجع حمادي

الأوله آااه ... والثانية آااه... والثالثة آااه...
الأوله آه علي شباب بيموت يوم العيد
والثانية آه علي فرح اتسرق في يوم العيد
والثالثة آه علي ضماير ونفوس ماتت من زمن بعيد

الأوله آه علي شباب بيموت في يوم العيد
الشاب نادى علي أمه وقالها
أديني اللبس الجديد بتاع العيد
عيد الميلاد المجيد
متعرفيش يامه قد إيه النهاردة سعيد
في نفس اليوم من كل سنة يسوع جه لأرضنا
عاش وسطنا وحمل ذنبنا وللموت قدم نفسه لأجلنا
قد إيه يامه حبه كبير
قد إيه يامه لنعمته أنا اسير
وكتير قلتله وأنا واقف قدام المذود
بهديلك نفسي وهو دا معني العيد
أمه ردت عليه ربنا يحفظك يا بني من كل شر
وجريت عليه وفي حضنها ضمته ودموع عينيها بتشر

آه علي قلب الأم .... لما يحس بغم
والشاب خرج باللبس الجديد
رايح يقدم نفسه لربنا ليلة العيد
والعريس دخل الكنيسة وسط الناس
وصلى بكل خشوع صلاة القداس
لكنه حاسس باختلاف
إنه خفيف ... إنه نضيف ... إنه عريس
وخرج العريس للشارع
وخطوات رجليه بتتسارع
ولأنه عدو الخير بيجول
بيتمشي كأنه غـــــول
كان مستنيه في صورة بشر
رصاص الغدر انطلق ... إنضرب في الوقت اللي فيه الشاب بيمر
وقع علي الأرض ... والدم سال ... يا كبدي دا الولد مات
آه عليك يا ولدي
آه عليك يا كبدي
في يوم العيد .. تبقى شهيد
والملايكة حملت الشهيد
بالتراتيل كانه عيد
ورب المجد بنفسه مستنيه وعلي راسه حط إكليل- إكليل الشهاده

والثانية آه علي فرح اتسرق في يوم العيد
وقلب الأم كان حاسس ... لأن أبنها كان زي العريس كده لابس
قلبها اتوخز علي ابنها . جريت علي الشارع وتصرخ يا ساتر
لقيت ابنها في وسط الدم غرقان وحواليه العساكر
صرخت آه يا ولدي
يا ريت الدم ده كان دمي
آه مين يحس يا ناس بألمي
اخديته في حضنها وهدومها اتملت دم
دمك يا ولدي مش هايروح هدر
حتي لو كان بيك العدو غدر
دمك بذره إتزرعت في الأرض
وهاتكبر وتجيب ثمر بالطول والعرض
قلبي ان كان انجرح
ونفسي جاز فيها سيف سرق الفرح
عزايا انه يسوع قبل ابني اندبح

والثالثة آه علي نفوس وضماير ماتت من زمن بعيد
ضماير ماتت من زمن بعيد
وقلوب قاسية زي الحديد
ونفوس مأسورة زي العبيد

مفكرين انه في مسك السلاح
هو ده الصلاح
وعشان ينالوا النجاح
لازم يواجهوا الكفرة بالكفاح
نفوس مأسوره .. نفوس مأجوره .. بشوية فلوس
وهو ده تمن يساوي ايه ؟ قدام النفوس
يا رب ازاي ناس زي دي نحب
وازاي نفتحلهم القلب
بعد ما قتلوا الشاب
وفي قلب الام سيف دب
ازاي نعيش الوصية
وقلوبنا مليانة قسية
يا رب تعال مد ايدك للقلب
أغمره بحبك عشان يعرف يحب
وأديني ضمير حساس
يقبل ويحب كل الناس
اللي حبوه .. واللي كرهوه .. واللي ضربوه... واللي أهانوه
واللي قتلوا ولاده وعينهم علي بناته

بقلم: ماجد الديب

المصدر: منتديات كنيسة مارجرجس بالحتاحتة

» قصيدة كلـــنا زي بعـــض بنفكر
» قصيدة للثورة هما كلمتين .. كلمة وكلمة